ILOILO CITY – Ginlaslasan sang kampo ni anay Iloilo City Mayor Jed Patrick Mabilog si Presidente Rodrigo Duterte matapos ginsulit na naman ang akusasyon sa anay alkalde may kaangtanan sa iligal nga droga.
Sa exclusive interview sang Bombo Radyo Iloilo kay Maria Victoria Mabilog, tiayon sang anay alkalde, gintawag sini nga kabutigan ang pahayag ni Duterte nga madugay na nga yara sa listahan sang mga may kaangatan sa illegal drugs ang iya bana.
Nahibaluan nga kadungan sang pagpadulong sa Iloilo agud magduaw sa haya ni Joanna Daniela Demafelis, ginpahayag sang presidente nga yara ang pangalan ni Mabilog sa listahan sang Philippine National Police (PNP), Armed Forces of the Philippines (AFP) kag Philippine Navy.
Suno kay Mrs. Mabilog, nagbuang na ang presidente kag naga-akusar ini apisar wala sang ebidensya.
Ginpaanggid ni Mrs. Mabilog ang sitwasyon kay Sen. Antonio Trillanes IV nga gin-akusaran sang presidente nga may mga tago nga bank accounts sa luwas sang pungsod sa diin sang ulihi, gin-ako man sang presidente nga himo-himo lang niya ini.
Ginhangkat man sang anay first lady sang siyudad ang anak sang presidente nga si Paolo Duterte nga ipakita ang iya tattoo nga amo ang ebidensya nga may kaangtanan ini sa grupo sang mga durugista.
Magluwas sini, gin-akusaran man ni Mrs. Mabilog ang presidente nga madamo sang tago nga bank accounts nga nagadangat sa binilyon ka pesos.
Dugang pa ni Mrs. Mabilog, kun nagmadinalag-on man ang presidente sa pagpalayas sa ila sa Pilipinas, indi ini mag-untat sa pagbato sa presidente sa mga ginahimo sini nga kabutigan.