Nagapanawagan si Msgr. Meliton Oso, Director sang Jaro Archdiocesan Social Action Center sang pagbinuligay sang gobyerno kag pumuluyo sa tunga sang nagapadayon nga pagsaka sang presyo sang produktong petrolyo kag amo man sang bugas.
Sa interview sang Bombo Radyo kay Msgr. Oso, iya ginpahayag nga mabatyagan na sa karon ang kasakit sang pagmahal sang mga balaklon bangud sa pagpataas sang mga gasolinahan sang mga gatong nga suno pa sa iya nga old stock pa ang mga ini.
Ginpunto man ni Oso nga ang pagsaka sang presyo sang gatong bunga sang “kadalok” sang iban nga nagapamintaha.
Suno sa iya, may obligasyon ang gobyerno nga i-regulate ang presyo sini kag nagapanawagan ini sa pagrepaso ukon pagbasura sang Oil Deregulation Law.
Gindugang man ni Oso nga dapat pamatian ang ginasinggitan sang mga driver nga kuhaon ang excise tax sa produktong petrolyo.
Nagapanawagan man ini sa publiko nga buylugan ang patigayunon nga transport strike buwas nga adlaw sang Lunes, Marso 23 bilang porma sang protesta.
Nagpahanumdum man ini sa publiko nga magbinuligay ang tagsa-tagsa, ilabi na ang mga kauturan nga naga-antos sa sini nga kabudlayan.
