Ginplastar ni Msgr. Meliton Oso, director sang Jaro Archdiocesan Social Action Center, ang iya mga panawagan agud nga mapa-preso ang mga kurap kag mapasabat sa ila nga mga kasal-anan apisar nga mataas pa ang ila ranggo ukon posisyon sa sosyudad.
Sa iya homily sa Jaro Metropolitan Cathedral 7:00 kaina sang aga, nag-apelar si Oso kay Ombudsman Jesus Crispin “Boying” Remulla nga magpreparar sang mapag-on nga kaso batok sa mga kurap nga opisyal.
Suno kay Oso, kun manabaw lamang ang preparasyon sang kaso, pat-od nga mabasura ini gilayon kag wala sang may mahatag nga hustisya.
“Kun wala mapreparahan sang husto, wala sang hustisya,” suno sa JASAC director.
Ikaduha, nag-apelar man ini nga maghanda man sang todo ang prosecution. Kaangot diri, nagpanawagan si Oso kay President Ferdinand Marcos, Jr. nga magpili sang prosecutor ukon huwes nga may integridad, may kahadlok sa Diyos, kag indi mabakal sang kuwarta.
Ini nga mga panawagan ni Oso ang kasunod sang iya ginaduso nga dapat masilutan gid ang kawatan bisan myembro pa ini sang Kongreso, kontraktor, ukon katapo man sang Department of Public Works and Highways kag Commission on Audit.
GAHUM SANG OMBUDSMAN
Nahibaluan nga sa idalom sang Konstitusyon, ang Office of the Ombudsman nga subong ginapamunuan ni Remulla ang may yara sang gahum nga magmato-mato sa pag-imbestigar. Mahimo man ini mag-imbestigar kun may complaint nga ginpasaka ang isa ka indibidwal batok sa public official ukon empleyado kaangot sa mga akto nga ginadudahan nga “illegal, unjust, improper, or inefficient.”
Sa subong, isa ang Ombudsman sa mga ahensya nga naga-imbestigar sa mga anomaliya sa flood control projects sa bilog nga pungsod paagi sa special panel sang prosecutors.
Ginabusisi sini ang mga iregularidad kaupod ang Independent Commission for Infrastructure (ICI), Department of Justice, Kamara, kag Senado.#
