Nagalaum ang director sang Jaro Archdiocesan Social Action Center (JASAC) nga ma-impeach sang mas temprano sa Kamara si Vice President Sara Duterte.
Sa interview sang Bombo Radyo kay Msgr. Meliton Oso, iya ginpahayag nga kun magsaka na ang articles of impeachment sa Senado, diri na kag may kahigayunan ang mga tawo nga mapamatian ang sabat ni Duterte kaangot sa sampaw-sampaw nga mga akusasyon sa iya.
Lakip sa ginpang-mensyonar sini nga kontrobersiya batok sa bise-presidente amo si “Mary Grace Piattos”, ang kapangalan sang isa ka popular nga potato chip brand nga isa sa ginlista nga recipient sang confidential funds ni Duterte sa Office of the Vice President (OVP).
Apisar 2024 pa nadiskubrehan ang pangalan nga ini kag iban pa nga makaduluda nga personalidad, wala gihapon nasanagan ang publiko kun sin-o ini bangud wala sang paathag nga ginhatag ang vice president.
“How we wish gid tani nga sa mas temprano ma-impeach siya sa lower house, agud pag-abot sa Senado, mahisayran sang banwa kun bala matuod nga tawo si Mary Grace Piattos, [kag] kun bala husto ang iya paggamit sang confidential funds,” suno kay Oso. Gindugang man sini ang iban pa nga kontrobersiya sa Department of Education nga ginpamunuan man anay ni Duterte sang yara pa siya sa Marcos Cabinet.
Dugang ni Msgr. Oso: “How we wish nga ma-impeach dayon [si Sara] sa lower house, kag pag-abot sa Senate, mahublasan naton kag may yara man siya sang kinamatarong agud nga [magsabat] kay wala ya ni ginsabat eh. Dugay na kita nagapamangkot eh: ‘Matuod bala nga tawo si Piattos, ukon junk food lang?'”
Nagapati man si Oso nga may “kalkalanay sang baho” nga matabo kasunod sang deklarasyon ni Duterte nga magapadalagan ini sa pagka-presidente.
Posible man suno sa JASAC director nga temprano pa nag-anunsyo sang iya presidential bid si Duterte bilang paandam sa mga kongresista sa iya nga plano. Masami nga nagapanguna si Sara sa mga survey sa pagka-presidente, gani posible suno kay Oso nga pamahog man ini sa mga mamalidha nga indi pabor sa iya sa impeachment case.
Nahibaluan nga napasaka na sa Office of the House Speaker ang ikaapat nga impeachment complaint batok kay Duterte.
Na-impeach anay si Duterte sa Kamara sang Pebrero 5, 2025 matapos nga 215 ka mga kongresista ang nagpirma sa ikaapat man nga complaint batok sa iya. Ginpasaka ang Articles of Impeachment sa Senado sang amo nga adlaw.
Sang Hulyo 25, gin-anunsyo naman sang Korte Suprema nga unconstitutional ang Articles of Impeachment bangud sa paglapas sa one-year bar rule sang 1987 Constitution. Sang Enero sini nga tuig, gin-uphold sang Supreme Court ang ila desisyon kag dalayon nga nagbasura sang motion for reconsideration nga gin-file sang Kamara.#
