ILOILO CITY – Nagpanawagan ang pinuno sang Jaro Archdiocesan Social Action Center (JASAC) sa publiko nga indi magpati sa pahayag sang mga politiko nga bulig sa mga pigado ang mga cash aids nga ginapanagtag.
Sa interview sang Bombo Radyo kay Msgr. Meliton Oso, Director sang JASAC, iya ginpahayag nga nga ang mga ayuda sang gobyerno kaangay sang Assistance to Individuals in Crisis Situation (AICS), TUPAD Information Management System kag Ayuda para sa Kapos ang Kita Program (AKAP) ang kwarta sang mga Pilipino.
Suno kay Oso, ini nga ayuda ang gina-utang mismo sang gobyerno kag ginabaydan pinaagi sa buwis ukon tax sang publiko.
Gin-akusaran man sini ang mga politiko nga ginagatasan lang ang government-owned and controlled corporation (GOCC).
Nahibaluan nga ginadumilian sang Commission on Elections (COMELEC) ang paghatag sang ayuda 10 ka adlaw antes ang midterm elections sa Mayo 12.
Buot silingon, umpisa sa Mayo 2, indi na mahimo magpanatag sang financial assistance kaangot sa Election Ban.
