Napatay na sa edad nga 59-anyos ang multi-awarded actress nga si Jaclyn Jose.
Wala pa ginsapubliko kun ano ang rason sang kamatayon sang amo nga iconic television and movie star, apang subong nga adlaw, Marso 3, sang ginpaguwa ang kumpirmasyon sang iya pagtaliwan.
Oktubre 21, 1964 sang ginbun-ag ang aktres sa pangalan nga “Mary Jane Guck” sa Angeles City, Pampanga.
1984 sang una ini nga nakit-an sa sinehan paagi sa iya mga papel sa ‘Chicas’ kag ‘Private Show’ tubtub amat-amat nga nakilala kag na-nominate sa prestihiyoso nga FAMAS Awards.
Ang iya nga kontribusyon sa film industry ang gin-selebrar man paagi sa madamo nga Gawad Urian kag Luna Awards nga amo pa ang nag-semento sang iya status bilang isa sa most distinguished actresses sang Pilipinas.
Kilala ini sa entertainment industry sa sulod sang pila ka dekada kag ang ginakabig pinakadaku nga award sini nga nabaton amo ang Best Actress award nga halin sa Cannes Film Festival sang 2016 bangud sa iya papel sa Ma’ Rosa, pelikula sa idalom sang direksyon ni Brillante Mendoza.
Sang 2023, ginhatagan man siya sang Movie Icon Award halin sa The Eddys.
May duha ini ka mga anak, sanday Gwen Garimond Ilagan Guck kag Andi Eigenmann — isa sa pinakakilala nga aktres sa Pilipinas.#
