ILOILO CITY – Ginapreparar na sang kampo sang multi-awarded nga hepe sang pulis sa banwa sang Ajuy, Iloilo ang mga legal nga tikang batok sa dismissal order sang Ombudsman.
Sa interview sang Bombo Radyo Iloilo, ginpahayag ni Atty. Isagani Pilas-Pilas, legal counsel ni C/Insp. Charlie Sustento kag sang tatlo pa ka pulis nga gin-dismiss sang Ombudsman sa serbisyo, ginatun-an na nila ang pagpasaka sang mosyon nga magahingyo sang injunction kag certiorari sa Court of Appeals ukon Supreme Court agud punggan ang dismissal order.
Kun mapaguwa na ang mando para sa implementasyon sang dismissal order, ginpahayag ni Atty. Pilas-Pilas nga mahimo man sila mag-file sang motion para sa Temporary Restraining Order (TRO).
Bastante suno sa abogado ang 15 diyas agud makapasaka sila sang motion for certiorari sa Court of Appeals.
Ginpasiguro naman sang Police Regional Office 6 (PRO-6) ang bulig kay Sustento kag sa tatlo ka pulis.
Ginpahayag sa Bombo Radyo ni PRO-6 spokesman Supt. Gilbert Gorero nga mismo si C/Supt. Cesar Hawthorne Binag, director sang PRO-6, ang nagpanguna sa pagbulig sa mga pulis bangud napamatud-an sini nga tampad sa serbisyo ang nasambit nga mga pulis.
Madumduman nga sa ika-116 nga anibersaryo sang Police Service, mismo si PNP chief Police Director General Ronald dela Rosa ang naghatag sang pagkilala kay Sustento bilang Best Chief of Police kun sa diin nangin Best Municipal Police Station naman ang ginapamunuan sini nga Ajuy Police Station.
Ang kaso batok kay Sustento ang ginpasaka sang mga complainants sang hepe pa ini sang Dumangas Police Station kun sa diin gin-akusaran ang chief of police nga nagpamilit nga sudlon ang compound nga ginapatihan may kaangtanan sa motornapping incident.