ILOILO – Nagpirma na subong nga adlaw, Enero 9, ang Iloilo Provincial Government sang multilateral agreement para sa pagbakal sang COVID-19 vaccine.
Ini ang kasunod sang pag-apruba sang Sangguniang Panlalawigan sa Iloilo sa hingyo ni Iloilo Governor Arthur Defensor Jr. sa pagsulod sa multilateral agreement program nga ginalakipan sang Department of Health, national goverment, kag British-Swedish multinational pharmaceutical kag biopharmaceutical company nga AstraZeneca.
Matandaan nga ginplastar man ni Defensor ang P95 million nga ginpain nga pondo sang probinsya sang Iloilo para sa pagbakal sang bakuna batok sa COVID-19.
Ginpahayag man ni Defensor nga 271,000 doses sang bakuna ang equivalent sang nasambit nga budget sang probinsya.
Sa interview sang Bombo Radyo kay Defensor, iya ginpahayag nga nagahulat na ang ila opisina sa pagpirma sang kasugtanan nga magbakal sang COVID-19 vaccine nagikan sa AstraZeneca.
Handa naman suno sa iya ang cold storage facility sang probinsya sa Iloilo Sports Complex kag sa provincial kag district hospitals.
Prayoridad man suno sa natungdan nga ipaidalum sa nasambit nga bakuna ang tanan nga frontliners kag vulnerable sa COVID-19
