Multiple injury, nagaguwa nga rason sang kamatayon sang LGBTQ+ member nga nasapwan-patay sa iya nga apartment sa Brgy. Our Lady of Lourdes, Jaro, Iloilo City

𝗜𝗟𝗢𝗜𝗟𝗢 𝗖𝗜𝗧𝗬 — Nagaguwa nga multiple injury ang rason sang kamatayon sang LGBTQ+ member nga nasapwan nga wala na sang kabuhi sa iya nga apartment sa Brgy. Our Lady of Lourdes, Jaro, Iloilo City.

Ang biktima amo si Victor “Vic” Lorca, Nurse V sang Center for Health Development – Western Visayas, kag tumandok sang Maasin, Iloilo.

Sa interview sang Bombo Radyo kay Police Captain Melchor Tolentino, Chief of Police sang Jaro Police Station, iya ginpahayag nga santo sa death certificate, multiple traumatic injury ang ikinamatay sang nurse, sa diin, ginalakip ini sa pag-request sang resulta sang autopsy test nga ginpatuman sa lawas sang biktima.

Suno kay Tolentino, posible nga ginlamposan ang biktima sang matig-a nga bagay, rason nga nag-agum ini sang pilas sa iya nga ulo, nga nangin kabangdanan man sang iya gilayon nga kamatayon.

Ginpahayag man sini nga dako nga bulig sa otoridad ang death certificate sang biktima bangud isa ini ka palaagyan agud makuha ang autopsy result kag matumod ang mga pilas sini.

Nagasalig naman ang natungdan nga mangin mabaskog nga dugang sa ebidensya ang resulta sa mga medical examination sa lawas sang biktima.

Nahibaluan nga ulihi nakit-an sa closed circuit television ang suspek nga naghalin sa Jalandoni Street, Jaro kag nagpadulong sa Brgy. Bolilao, Mandurriao nga nagliko padulong sa distrito sang Lapaz.