Ginlockdown ang Municipal Hall sa banwa sang Bingawan, Iloilo umpisa subong nga adlaw tubtob sa Myerkules, Marso 24.
Ini ang kasunod sang pagpositibo sa COVID-19 sang anom ka empleyado sang Municipal Hall sa diin ang isa diri ang nagikan sa National Government Agency apang na-assign sa amo nga banwa.
Sa interview sang Bombo Radyo kay Mayor Mark Palabrica, iya ginpahayag nga nagdangat sa 25 ang high risk close contact sang amo nga mga empleyado kag nagapadayon pa subong ang contact tracing.
Suno kay Palabrica, gilayon man nga ginpaidalom sa Reverse Transcription Polymerase Chain Reaction (RT-PCR) test ang tanan nga empleyado sang Municipal Hall ilabi na ang mga nakabatyag sang mild symptoms sang COVID-19.
Ginpakamaayo man suno kay Palabrica nga ipatuman ang work from home sa pila ka mga empleyado sang Municipal Hall.
Ginpahayag sang alkalde nga bukas sa gihapon ang emergency offices sang Municipal Hall kaangay sang Rural Health Unit.
Nagpangabay naman ang natungdan sa iya mga pumuluyo nga magkooperar sa pagsunod sang minimum health protocol kag mas maayo nga indi nalang anay magwa sa mga balay kun wala sang importante nga kadtuan.
