Ginlockdown kag ginsirado ang Municipal Hall sang banwa sang Dumangas, Iloilo matapos nagpositibo sa COVID-19 ang duha ka empleyado.
Sa interview sang Bombo Radyo kay Mayor Onal Golez, iya ginpahayag nga ginmanduan na niya ang tanan nga personnel sang nasambit nga talatapan nga magpaidalom sa Reverse transcription polymerase chain reaction (RT-PCR) test.
Magluwas sini, gindisinfect man ang Municipal Hall.
Suno kay Golez, nagapadayon man subong ang contact tracing kag kun indi na madugangan ang numero sang mga empleyado nga COVID-19 positive, posible nga magabukas man sila sa Byernes, Abril 16.
Gin-ako man sang alkalde nga natalana man siya nga magpaidalom sa swab test sa diin nagalaom man siya nga mangin negatibo ang resulta bangud maayo man ang iya kahimtangan.
Panugyan sang natungdan sa publiko, indi magpakampante kag istrikto nga magsunod sa mga health protocol bangud yara lamang sa palibot ang COVID-19.
