ILOILO CITY – Suguran na sang National Police Commission (Napolcom) ang pre-charge investigation batok sa Pototan Municipal Police Station.
Ini matapos mapaslawan ang Pototan PNP sa pagpasaka sang kaso batok sa Treskelion Fraternity may kaangtanan sa hazing nga natabo sa Barangay Fernando Parcon Ward, Pototan, Iloilo kun sa diin lima ka mga neophytes ang nag-angkon sang mga hematoma matapos gin-paddle.
Ginpahayag sa Bombo Radyo Iloilo ni Napolcom spokesman kag pre-charge investigator Allen Camiring nga sentro sang patigayunon nga imbestigasyon sang ahensiya ang chief of police sang Pototan nga si Sr. Insp Bonifacio Alabe kag ang imbestigador.
Sa ti-on nga mapamatud-an nga may probable cause, magapangatubang sang kaso nga irregularity on the performance of duty ang kapulisan sang Pototan.
Una na ginpahayag ni Insp. Alabe nga nagdesisyon ang pamilya sang lima ka mga biktima nga indi na magpasaka sang kaso, kag indi man sini gusto maguba ang bwas damlag sang mga kabataan.