ILOILO CITY- Indi na mag-apela ang Iloilo Provincial Government may kaangtanan sa ginrekomendar sang Inter-Agency Task Force (IATF) nga extension sang Modified Enhanced Community Quarantine(MECQ) sa probinsya umpisa Hulyo 1 tubtob 15.
Sa interview sang Bombo Radyo kay Iloilo Governor Arthur Defensor Jr., iya ginpahayag nga wala sa gihapon nagapanaog ang kaso sang COVID-19 sa probinsya kag classified ini bilang kritikal gani mas maayo nga yara ini sa MECQ status.
Apang suno kay Defensor, may yara lang sang mga minor adjustments nga ipatuman kag ini ang buas pa i-finalize paagi sa ipagwa niya nga executive order.
Gin-athag naman sang gobernador nga apisar magapabilin ang MECQ status sang probinsya, indi naman pag-i-extend ang pagpatuman sang Municipal Quarantine nga maga-expire na buwas, Hunyo 30.
Suno sa opisyal, nagakahulugan nga indi na kinahanglan pa sang travel pass ang mga pumuluyo sa probinsya.
Apang ipatuman sa gihapon ang limitasyon sang mga nagasulod halin sa gwa sang probinsya kon sa diin ang Omnibus Guidelines amo ang basehan sini.
