SAN LORENZO, GUIMARAS – Temporaryo nga ginpasirado ang munisipyo sang San Lorenzo, Guimaras.
Ini ang kasunod sang pagpositibo sa COVID-19 sang bana sang municipal employee sang San Lorenzo.
Sa interview sang Bombo Radyo kay Mayor Ninfa Gajo, iya ginpahayag nga nagapadayon sa subong ang contact tracing kun sa diin ginapaabot na lang ang resulta sang confirmatory test sang tanan nga posible naka-close contact sa pasyente.
Suno kay Gajo, ginpasirado ang munisipyo umpisa sang Agusto 7 agud hatagan sang ligwa ang disinfection.
Ginpahayag ni Gajo nga ang bana sang municipal employee ang nagatrabaho sa AC Energy kag natukiban nga nagpositibo sa COVID-19.
Ang municipal employee suno kay Gajo amo ang nagasugat sa iya bana sa banwa sang Jordan.
Bisan ang alkalde ang nagpaidalom naman sa home quarantine bilang pagsunod sa protocol.
