Kinahanglan sang tiglawas sang Pilipinas nga si Chelsea Manalo ang bayanihan spirit sang Filipino pageant fans!
Sa isa sa recent posts sang Miss Universe Philippines (MUPh) organization, ginbutang ang poster nga nagahingyo sa Filipino fans kag pageant followers nga magboto sa ‘Voice for Change’ video ni Chelsea.
Advocacy ini para sa mga pamilya sang migrant workers kag makabig gid nga “timely and essential.”
“PHILIPPINES! If you have OFW relatives or know anyone working abroad, you should watch CHELSEA MANALO’s Voice for Change! Our queen’s advocacy for the families of migrant workers is both timely and essential, championing the welfare of their children back home in the Philippines,” post sang MUPh.
Ginhingyo man sang organisasyon sa pageant fans nga depensahan ang Voice for Change win sang Pilipinas.
Ini bangud sang nagligad nga tuig, ang beauty queen nga si Michelle Dee ang nagdaog sa amo nga parte sang kumpetisyon matapos ang iya pag-advocate sa autism awareness kag sa autism works programs sang Autism Society of the Philippines (ASP).
Yara na subong si Chelsea sa Los Angeles, California para sa dugang nga training para matiglawas sang mas maayo ang Pilipinas sa nagahilapit nga Miss Universe 2024 pageant sa November 16.
Ginalauman sini nga makuha ang panglima na nga Miss Universe crown sang Pilipinas nga ulihi nadag-an ni Catriona Gray sang 2018.
Patigayunon ang global pageant sa Arena CDMX sa Mexico City, Mexico kun sa diin natalana nga ipasa ni reigning titleholder Sheynnis Palacios ang korona sa iya mangin successor.
