BAROTAC VIEJO, ILOILO – Kaso nga murder kag rape with homicide ang posible ipasaka batok sa suspek nga amo ang nagkuga-patay sa isa ka 16-anyos nga dalagita sa Brgy. San Lucas, Barotac Viejo, Iloilo.
Matandaan nga ang biktima amo si Jenevee Balleza Carrera, incoming Grade 11 student, residente sang nasambit nga lugar samtang ang suspek naman amo si Bernard Dumacod alyas Alog, tumandok sang Cabuyao, Laguna apang temporaryo nga nagatinir sa Brgy. San Lucas sa amo man nga banwa.
Sa interview sang Bombo Radyo kay Police Captain Ken Albert Lepsia, hepe sang Barotac Viejo Municipal Police Station, iya ginpahayag nga bastante ang ila mga ebidensya nga ginpatay sang suspek ang biktima kag ini ang ginpabaskog pa sang mismo pag-ako sang suspek kag pagtestigo sang iya duha ka abyan nga amo ang iya una nga ginsugidan sang nahimo nga krimen.
Ginahulat pa sang Barotac Viejo Municipal Police Station ang conclusive nga resulta sang autopsy examination, apang posible suno kay Lepsia nga ginpilit ni Alyas Alog nga magpakighilawas sa dalagita apang nagpamalibad ang biktima, ginkaros ang suspek, rason nga naimpito ini kag nahimo ang krimen.
Ginpahayag sang hepe nga may ginasuksok nga panapton ang biktima apang sa inisyal nga pagpangusisa sang pulis, may gisi ang kinatawo sang dalagita, kag ginausisa sa subong ang posibilidad nga ginpailisan liwat ang dalagita matapos ang penetration.
Nahibaluan nga hubog ang biktima sang natabo ang krimen, apang indi sini kaupod ang suspek sang nag-inom ini bangud ginapahayag nga pamilyar sila sa isa kag isa apang wala man nakaagi nga nakaistoryahanay.
ILOY: ‘BISAN TAMPUYONG NA LANG, HUDAS SIYA, NGAA MAN GINPATAY YA ANG BATA KO?’
Samtang, “bisan tampuyong na lang” ang mahimo ni Rowena Carrera, iloy sang biktima agud makabalos sa suspek.
Sa interview sang Bombo Radyo kay Carrera, iya ginpahayag nga wala pa niya nakit-an ang suspek kag tubtob subong, indi niya mabaton nga ginpatay gid sini ang iya anak apisar indi man sila magkilalahay.
Single mother si Carrera kag subang niya nga anak ang biktima nga si Jenevee.
Aminado si Carrera nga indi na niya makontrol ang iya anak bangud nahuyog ini sa barkada kay may mga tion nga kaagahon na ukon indi na ini makapauli sa ila balay.
Handa ang natungdan nga magpasaka sang kaso batok sa suspek tubtob nga madunot ini sa presuhan.
Nagapati si Carrera nga may motibo gid ang suspek nga himuslan si Jenevee bangud indi man mangkaros ang dalagita kun wala ini ginpwersa sang lalaki.
