ILOILO CITY – Ginkanselar ang music festival sa Malaysia matapos nga ginpakalamaot sang lead singer sang British band nga The 1975 nga si Matty Healy ang anti-lesbian, gay, bisexual, and transgender laws sang pungsod kag ginhalukan ang bandmate sa stage.
Ang on-stage incident sa Good Vibes Festival sa Kuala Lumpur ang nagtulod sa Ministry of Communications sang pungsod nga i-cancel ang nabilin nga tatlo ka adlaw nga event.
Ang homosexual acts ang iligal sa Malaysia kag mahimo nga mapinahan ang sin-o man nga naglapas sang tubtob 20 ka tuig nga pagkapreso.
Sa expletive-laden speech sa headline performance sang banda, ginpahayag ni Matty nga indi niya makita ang punto sa pag-imbitar sa The 1975 sa nasambit nga pungsod kag nagadikta kun sin-o ang mahimo nila nga maka-partner.
Sa masubo nga palad suno kay Matty, indi na sila maka-perform sang madamo nga kanta bangud nga tuman siya ka akig.
Ginbuyagyag man niya nga ginkonsiderar nila ang pag-cancel sang show apang gindayon nalang agud nga indi madismaya ang mga fans.
Pagkatapos sang pahayag ni Matty, nagpalapit ang bassist nga si Ross MacDonald kag ginhalukan ini sa stage.
