ILOILO CITY – Nanari-sari nga pagpanghangkat ang naeksperyensyahan sa tagsa ka tuig nga pagpatigayon sang Bombo Music Festival.
Sa Good Morning Philippines program, ginpahayag ni Maestro Gerardo ‘Bimbo’ Muyuela, musical director sang Bombo Symphony Orchestra, iya ginpahayag ngasa apat niya ka tuig nga pagserbe sa Bombo Music Festival, madamo ang pagpanghangkat ilabi na kun paano mapanami ang musika sang tagsa ka finalist.
Suno kay Muyuela, sa tagsa ka tuig, nanari-sari nga genre ang nakasulod sa Top 12 rason nga makalilingaw ang performance sang mga interpreter.
Ginpahayag ni Muyuela nga madamu pa nga revision ang ginapatigayon sa piyesa sang Top 12 finalist kag sa grand performance night, ang live accompaniment ang ginabug-usan sang pagtukar sang nanari-sari nga musical instruments.
Bilang musical director suno sa natungdan, iya gid nga ginadayaw ang abilidad sang mga composer sa pagbalay sang ambahanon nga may pinasahi ukon bag-o nga genre.
Samtang, para sa naman kay Dr. Jose Jimenez Patubo, cultural worker kag tourism officer sang San Enrique, Iloilo, makabig nga madinuagon ang pagpatigayon sang Bombo Music Festival nga iya gid nga ginasaksihan sa tagsa ka tuig.
Suno kay Patubo, ginakalipay niya ang adbokasiya sang Bombo Radyo Philippines sa pagtib-ong sang Original Pilipino Music kag sang local talents ilabi na nga isa ka national competition ang Bombo Music Festival.
Ginpahayag ni Patubo nga indi mahinago nga kalabanan sa mga ulihing tubo ang naganyat na sa mga foreign music rason nga dapat nga pabaskugon ang kampanya sa pagtib-ong sang Filipino Music nga nagapakita sang kultura sang pungsod.
