ILOILO – Nagsadsad ang Cokaliong nga MV Filipinas Cebu sa Igbon Island, Concepcion, Iloilo.
Ini ang may sakay nga 223 ka mga pasahero nga ginalakipan sang 220 ka mga adults kag tatlo ka mga kabataan.
Sa interview sang Bombo Radyo kay Commander Paterno Belarmino Jr. commander sang Coast Guard Station Iloilo, iya ginpahayag nga las 7:00 kagab-i, naghalin ang nasambit nga passenger vessel sa Iloilo City kag padulong kuntani sa Cebu City.
Apang paglabay sa baybayon sang Igbon Island, Concepcion, Iloilo, nagsadsad ini.
Suno kay Belarmino, may ginlikawan nga sakayang pandagat ang MV Filipinas Cebu tubtub nagsadsad ini.
Gilayon naman nila gintawgan ang kapitan sang barko kag ginkumpirma sini ang insidente.
Nagpadala naman sang rescue vessel ang sub-station sang Philippine Coast Guard Iloilo sa nasambit nga baybayon kag ginbuligan ang mga pasahero.
Gin-athag man ni Belarmino nga normal ang panahon sang nagsadsad ang barko.
Gin-rescue naman ang mga pasahero sang MV Filipinas Nasipit.
Sa subong, nagapadayon pa ang imbestigasyon sang Philippine Coast Guard sa insidente.
