Ginklaro sang Philippine Coast Guard (PCG) nga indi overloaded ang barko nga Trisha Kerstin 3 sang natabo ang trahedya sang Lunes sang kaagahon nga nag-utas sang kabuhi sang 18 na ka mga tawo.
Ginkumpirma ini ni PCG Commandant Adm. Ronnie Gil Gavan, Coast Guard District Southwestern Mindanao Commander Commodore Rejard Marfe, kag Maritime Industry Authority.
Ini nga barko sang Aleson Shipping Lines ang may yara sang maximum capacity nga 350 ka mga pasahero. Sang adlaw nga natabo ang insidente, 344 ang sakay sini.
Suno pa kay Gavan, madasig man ang pag-responde sang sea marshals kasunod sang nabaton nga report nga may insidente nga natabo ginabanta ala una sang kaagahon.
Sandig sa inisyal nga reports nga ginhatag sang PCG kag sandig man sa statement sang survivors, nagka-problema ang barko samtang nagalayag ini 2.75 nautical miles northeast sa bisinidad sang Baluk-Baluk Island sa banwa sang Hadji Muhtammad.
316 ka pasahero ang naluwas, samtang 10 naman ang padayon ang ginapangita.
STATEMENT SANG ALESON
Nagpagwa naman sang pahayag ang Aleson Shipping Lines, Inc. kaangot sa paglugdang sang ila barko.
Suno sa ila, halin sang nabaton nila ang distress call, gilayon nga ginpatuman ang quick response measures kag gin-deploy ang tanan nga available nga mga barko sa lugar.
Padayon man suno sa ila ang ila pakig-angot sa PCG kag iban pa nga mga ahensya para sa padayon nga search and rescue operations.
Ini na ang pangaduha nga daku nga trahedya sa amo nga kumpaniya sa sulod sang tatlo ka tuig.
Sang Marso 29, 2023, nasunog man ang MV Mary Joy 3 sang Aleson samtang pakadto sa Jolo. 31 ang patay kag 216 ang na-rescue sa amo nga insidente.#
 nga indi overloaded ang barko nga Trisha Kerstin 3 sang natabo ang trahedya.){kind=link}