Bilang kabahin sang kilos-protesta antes sang ika-apat nga State of the Nation Address (SONA) ni President Ferdinand Marcos Jr., ginpangsunog sang mga myembro sang Bagong Alyansang Makabayan (Bayan) Southern Tagalog ang duha ka effigy nga ginhingadlan nila nga “ZomBBM” kag “Sara-nanggal”.
Suno sa grupo, ang nasambit nga mga effigy nagapakita sang “mga halimaw sang katilingban” nga nagapadayon sang pagpang-abuso sa mga pumuluyo.
Ang “ZomBBM”, nga halin sa terminolohiya nga “zombie” kag BBM (Bongbong Marcos), nagalaragway kay Marcos bilang sunod-sunuran sa interes sang Estados Unidos.
Sa likod sang effigy, may imahe ni former U.S. President Donald Trump, nga ginatudlo sang grupo bilang simbolo sang imperyalismo nga Amerikano nga ginapasunod ni Marcos.
Samtang, ang “Sara-nanggal” ang naghalin sa ngalan ni Bise Presidente Sara Duterte kag sa halimaw nga “manananggal” sa diin ginlaragway nga may ginbulag nga lawas kag nagagwa ang daku nga kantidad sang kwarta sa iya idalom.
Ini nagasimbolo sang isyu sang korapsyon sa iya opisina.
Nahanungod sini, ginpahanumdom sang grupo ang impeachment nga ginpasaka batok kay Duterte sang Pebrero 5, nga may kaangtanan sa gina-question nga paggamit sang pondo sang Office of the Vice President (OVP) kag Department of Education (DepEd).
Apisar pa man nga ginbalik sang Senado ang kaso sa Kamara kag gin-deklarar sang Korte Suprema nga unconstitutional ang impeachment process, ginpahayag ni SC spokesperson Camille Ting nga indi sini ginapasiguro nga wala sang sala si Duterte sa ginahimo nga alegasyon sang korapsyon.
