Wala napunggan sang isa ka myembro sang Cofradia del Santo Niño de Cebu, Iloilo Chapter nga mangin emosyonal kasunod sang pagpili kay American Cardinal Robert Francis Prevost bilang bag-o nga Santo Papa.
Sa interview sang Bombo Radyo kay Gilda Robles Roxas, member sang Cofradia del Santo Niño de Cebu, Iloilo Chapter, iya ginpahayag nga nangin makahalawat-hawat ang sitwasyon nila sang nagabantay sang pag-anunsyo sang masunod nga Santo Papa.
Suno kay Roxas, naghibi gid siya sang ginlawag ang pangalan ni Cardinal Robert Francis Prevost, indi bangud sa kasubo kundi bangud sa kalipay nga iya nabatyagan.
Ginpahayag man sini nga indi matupongan ang iya kalipay nga nabatyagan bangud ang bag-o nga Pope ang isa ka Augustinian ukon myembro sang Order of Saint Augustine.
Dugang ni Roxas, apisar nga wala napili si Cardinal Luis Antonio Tagle, nagapasalamat siya sa gihapon bangud ang ila church ang myembro sang Augustinian religious order.
Nahibaluan nga lakip sa ginkadtuan ni Pope Leo XIV amo ang Santo Nino de Cebu Parish sa Barangay Mohon, Talisay City sa ika-19 nga anibersaryo sang ila nga Canonical Foundation bilang Domus Formata.
Ginpakigbahin man sang Catholic Bishop’s Conference of the Philippines (CBCP) nga nagbisita ini sa Pilipinas sang September 2010 para sa Intermediate General Chapter sang congregation.
Sa amo tion, nag-preside si Father Prevost sa misa sa San Agustin Church sa Intramuros, Manila.
