ILOILO CITY – Indi upang para sa isa ka myembro sang Indigenous People’s Group kag benepisyaryo sang 4Ps program ang tanan nga mulay kag insulto agud mapasaran ang March 2023 Licensure Examination for Teachers.
Sa interview sang Bombo Radyo kay Gena Jane Jamili nga tumandok sang Barangay Yabon, Janiuay, Iloilo, iya ginpahayag nga nagpaninguha gid ini agud malab-ot ang handom.
Suno kay Jamili, gamay pa lang ini, namuklat na ang iya mga mata sa kapigaduhon sa diin nagatrabaho bilang mangunguma ang amay, kag housewife naman ang iloy kag may ginaatipan nga anum ka mga kabataan.
Ginpahayag dugang sang natungdan nga bangud sa kapigaduhon kinahanglan sini mag-upod sa iya lola tubtob sang siya ang naga-edad sang walo ka tuig bangud malnourished ini.
Bangud yara ini sa pagtatap sang iya lola, diri na kag gintudluan ini sa pagbasa apisar 3 years old pa lang.
Para kay Jamili, nangin palaagyan ang nangin eksperyensya niya sa kabuhi agud makatapos sa kolehiyo sa diin nangin Magna Cum Laude ini sa kurso nga Bachelor of Secondary Education, Major in Filipino sa West Visayas State University – La Paz.
Sa subong, nagahandom si Jamili nga makatudlo sa iya lugar kun sa diin tinutuyo sini nga balikan ang maayo nga paghanas sang iya mga manunudlo kag balikdan ang mga kabataan sa iya barangay paagi sa pagtudlo man sa ila.
