ILOILO CITY – Nagapanguna nga violator ang myembro sang Philippine National Police base sa mga nabaton nga human rights abuse cases sang Commission on Human Rights Region VI.
Sa interview sang Bombo Radyo kay Atty. Jonnie Dabuco, director sang Commission on Human Rights Region VI, iya ginpahayag nga sa tanan nga nabaton nga kaso, indi magtaas sa 50 porsyento diri ang kahimuan sang kapulisan.
Suno kay Dabuco, ini ang posible bangud sang sahi sang trabaho sang kapulisan kag masami sila nga ginareklamo.
Dugang pa niya, gina-dismiss man nila ang reklamo sa tion nga makita nga wala sang ground agud nga magpatigayon pa sang dugang nga imbestigasyon.
May yara man nga gina-refer sa Office of the Ombudsman kag sa Office of the Prosecutor.
Ang iban naman nga ginapalab-ot sa ila opisina nga na-file na ang gina-monitor nalang sang Commission on Human Rights.
Lakip man sa mga reklamo nga nabaton sang ahensya amo ang extra judicial killings nga natabo sang 2017 tubtob sa una nga bahin sang 2019.
Apang sang natabo ang pandemya, dako ang gin-nubo sini.
Samtang, sa bahin naman sang Armed Forces of the Philippines partikular na sa Philippine Army, kalabanan nga kaso ang nabaton sa Negros Occidental.
Suno kay Dabuco, gin-intensify sang gobyerno ang kampanya batuk sa insurhensya gani, madamo sang gina-alegar nga paglapas sa tawhanon nga kinamatarong.
