Gin-delay sang International Olympic Committee (IOC) ang medal ceremony para sa team figure skating competition sa nagapadayon nga Winter Olympics sa Beijing, China bangud sa ginpahayag “legal issues” nga kinahanglan pa solbaron.
May media reports nga naga-guwa nga isa ka myembro sang Russian Olympic Committee (nga amo ang nakakuha sang una nga pwesto) ang nagpositibo sa drug test.
Wala gintumod kun sin-o nga Russian skater ang nangin positive sa test, kun san-o ginpatigayon ang test, kag kun ano nga partikular nga substance ang na-trace.
Wala pa sang komento nagikan sa IOC, International Skating Union, Russian Olympic Committee kag international agency nga charge sa drugs testing.
Sa amo nga kumpetisyon, nakuha sang Russia ang bulawan nga medalya, nagapanguha ang Estados Unidos, kag nagapangatlo ang Japan.
Sa idalom sang pagsulundan sang Olympic Games, may nagakaigu nga penalidad nga idagdag batok sa sin-o man nga madakpan nga magagamit sang droga agud nga mapaayo ang performance sa hinampang.
Antes sini, ang Russians ang may yara na nga daan sang duha ka tuig nga ban sa Olympiada, kag subong naga-aserbe lang bilang mga tiglawas sang Russian Olympic Committee. Kasunod ini sang daku nga Russian state-sponsored doping program nga nadiskubrehan sang 2016.
