ILOILO CITY – Nakuhaan sang iligal nga droga kag madamo nga armas ang myembro sang Revolutionary Proletarian Army Alex Boncayao Brigade kag hinablos sini sang ginserbehan sang search warrant sa Sitio Ermita Barangay Bongol, Janiuay, Iloilo.
Ang arestado nga rebelde amo si Loreto Cava Jr., 67, residente sang nasambit nga lugar kag aktibo nga myembro sang Revolutionary Proletarian Army Alex Boncayao Brigade.
Si Cava ang una na nga napreso bangud sa kaso nga homicide.
Dakop man ang hinablos sini nga si John Patrick Jaen, 22.
Nakuha sa balay ni Cava ang duha ka sachet sang shabu; anum ka 12 gauge homemade firearm; apat ka .38 caliber revolver; duha ka fragmentation hand grenade; isa ka .45 caliber; mga bala kag kwarta nga P2, 770.
Nakuha naman sa hinablos sini ang mga illegal drugs paraphernalia kag kwarta nga nagdangat sa P1,150.
Sa interview sang Bombo Radyo kay Police Brigadier General Leo Francisco, director sang Police Regional Office 6, iya ginpahayag nga ini ang kabahin sang Birada Semana nga amo ang reinforcement sang Simultaneous Anti-Criminality Law Enforcement Operations.
Ang operasyon ang ginpatigayon sang gintingob nga pwersa sang Janiuay Municipal Police Station, Iloilo Provincial Intelligence Unit, 603rd Regional Mobile Force Battalion VI, 1st Iloilo Provincial Mobile Force Company, Special Weapons and Tactics kag sang Explosives and Ordnance Division.
Natalana nga pasakaan sang kaso nga Violation sang Republic Act 10591 ukon Comprehensive Firearms and Ammunition Regulation Act kag Violation sang Republic Act 9165 ukon Comprehensive Dangerous Drugs Act of 2002 ang mag-tiyo.
