ILOILO CITY – Wala nakaapekto ang Novel Coronavirus scare sa mga deboto nga magpaudlong sa Jaro Metropolitan Cathedral agud nga magtambong sa misa kag sa prusisyon ni Nuestra Señora dela Candelaria.
Antes pa man ang adlaw sang fiesta, may mga aktibidad na nga ginpatigayon kasubong sang Novena Masses nga ginpatigayon humalin sang Enero 24 tubtob Pebrero 1, sa tagsa ka 5:30 sang hapon sa Jaro Metropolitan Cathedral.
6:30 kahapon sang kasisidmon, Pebrero 1, ginpatigayon ang koronasyon sang imahe Nuestra Señora de la Candelaria sa pagpamuno ni Jaro Archbishop Most Reverend Jose Romeo Lazo.
Subong nga adlaw, Pebrero 2, may misa kada oras, umpisa 4:00 sa kaagahon tubtub 6:00 sa aga sa Main Altar samtang ang Solemn Concelebrated Mass ang ginpatigatyon 7:00 kaina sang aga sa pagpamuno ni Jaro Archbishop Most Reverend Jose Romeo Lazo kag ini ang ginsundan sang kada oras nga misa sa Main Altar, umpisa 9:00 kaina sang aga tubtub 12 sa udto.
Kadungan sang misa sa Main Altar sa Jaro Metropolitan Cathedral, may misa man nga ginapatigayon sa Grotto kada 30 minutos umpisa 5:00 sa kaagahon tubtob 11:30 sang aga.
May misa nga patigayunon sa Main Altar umpisa 3:00 karon sa hapon kag 4:00 sang hapon, patigayunon ang Solemn Procession samtang nagapangamuyo sang Santos nga Rosaryo nga mabatian live sa Bombo Radyo.
Ini ang pagasundan sang misa nga pangunahan ni Most Reverend Daniel Patick Parcon, Bishop sang Talibon, Bohol kag may misa man nga patigayunon 7:00 tubtub 8:00 sa gab-i.
Tuman naman ka laba ang pila sa imahe ni Nuestra Señora dela Candelaria nga napahamtang sa balcony sang Jaro Metropolitan Cathedral kag amo man ang mga deboto nga maluyag magpalapak sa imahe sang mga santos.
May kaangtanan naman sa kahiwatan, tuman ka hugot ang ginapatigayon nga seguridad tubtub nga matapos ang kapiyestahan.
Ginsirado ang palibot sang Jaro Plaza kun sa diin gina isa-isa sa pagrikisa ang mga nagasulod sa palibot sang Jaro Plaza.
