Nagsaka na sa 1,100 ang casualties halin sa militar sang North Korea sang nagbulig sa giyera sang Russia batok sa Ukraine.
Ini ang ginkumpirma sang South Korea-Joint Chiefs of Staff (JCS) kasunod sang report sang spy agency sa mga miyembro sang parliament sa Seoul.
Sang nagligad nga semana, una gin-report nga 100 ka mga soldado halin sa Pyongyang ang napatay sang nag-intra na sa amo nga away subong nga bulan.
“Through various sources of information and intelligence, we assess that North Korean troops who have recently engaged in combat with Ukrainian forces have suffered around 1,100 casualties,” kabahin sang statement sang JCS. “We are particularly interested in the possibility of additional deployments of North Korean soldiers to aid Russia’s war effort,” dugang sini.
Matandaan nga una na ginreport nga 12,000 ka tropa ang ginpadala ni North Korean leader Kim Jong Un agud magbulig sa mga soldado ni Russian President Vladimir Putin sa pag-atake sa Ukraine lakip na sa Kursk border region nga naagaw na sang Ukrainian forces sa mas temprano nga bahin subong nga tuig.
Base sa statement sang JCS, nagapreparar ang North Korea sang rotation kag dugang nga deployment sang mga soldado.
Base pa sa intel report sang Seoul, nagahimo kag nagahatag ang North sang “self-destructible drones” sa Russian army pati na ang 240mm rocket launchers kag 170mm self-propelled howitzers.
Ginalantaw nga may ipadala nga dugang nga suicide drones matapos ang test nga ginpangunahan mismo ni Kim sang nagligad nga bulan.
