Gin-report sang South Korea nga naglab-ot na sa 300 ka mga soldado sang North Korea ang napatay kag 2,700 ang napilasan sang nagbulig ang mga ini sa giyera sang Russia batok sa Ukraine.
Suno ini sa figures nga gin-release sang Seoul matapos ang briefing kaupod sa ila spy agency ukon National Intelligence Service.
Suno kay South Korean lawmaker Lee Seong-kweun, may impormasyon pa nga ginmanduan ang North Korean soldiers ukon ang halin sa elite Storm Corps nga magpanginmatay na lang sa baylo nga himuon sila nga prisoner sa Ukraine.
Kun nakahibalo sila nga madakpan na sila, nakasaad sa mandu sang North Korean authorities nga palukpan na lang nila ang ila nga kaugalingon.
May isa pa ka North Korean soldier nga buot na madakpan, apang nagsinggit ini sang “General Kim Jong Un” kag nagtuyo nga palukpon ang granada, apang naunahan siya sang Ukrainian soldiers kag siya ang ginluthang-patay.
Nahibaluan man sang spy agency sang South Korea nga kulang sa ihibalo ang North Korean soldiers sa modern warfare kag gingamit ini sang Russia rason nga mataas ang numero sang casualties.
Una na nga gin-report sang Seoul nga 10,000 ka mga soldado ang ginpadala sang Pyongyang agud mabuligan ang tropa ni Russian president Vladimir Putin.
Sa pihak nga bahin, nagpaguwa naman sang statement si Ukrainian President Volodymyr Zelensky nga handa siya nga ibalik ang ila nadakpan nga duha ka North Korean soldiers kabaylo sang Ukrainian prisoners of war nga yara sa Russia.
Gin-report man sang Security Service of Ukraine nga ang isa sa duha ka soldado nga ila nadakpan ang nagpanugid nga nagdumdom siya nga makadto sila sa Russia para sa training kag wala naghaum nga ipadala sila sa gyera.
