Yara na sa 50 ka mga kahoy ang natumba sa Iloilo City bangud man sa mabaskog nga hangin nga dala ni Bagyo Kristine sa Western Visayas.
Sa interview sang Bombo Radyo kay Mr. Darwin Papa, Operation Officer sang Iloilo City Disaster Risk Reduction and Management Office, iya ginpahayag nga nagbuligay na sila sang pila ka talatapan lakip na ang Iloilo City Environment and Natural Resources Office (CENRO) kag General Services Office (GSO).
Suno kay Papa, dako nga pagpanghangkat sa ila bahin ang rorok nga naglab-ot sa pila ka dalan sang syudad.
Onse naman ang na-record nga mga poste sang kuryente ang natumba sa syudad.
Ginapahamtang man sa Disaster Waste Area sa Calajunan, Mandurriao ang tanan nga mga natipon nga kahoy.
Gina-ekspektar naman sang talatapan nga madugang pa ang mga kahoy nga matumba ilabi na nga nagapabilin nga madlos ang hangin.
Nagpanugyan naman ang natungdan sa mga pumuluyo sang syudad nga yara sa coastal barangay nga maghalong sa posible nga pagtaas sang tubig ukon high tide.
Naglab-ot man sa 90 ka mga balay ang nagakalaguba sa syudad bangud sa bagyo, kon sa diin 27 diri ang totally damaged kag 63 naman ang partially damaged.
