Nagsaka na sa 81 ka mga tawo ang na-report nga nagkalamatay bangud sa paglaslas ni Severe Tropical Storm Kristine (international name: Trami).
Suno kay Office of Civil Defense (OCD) Administrator kag Undersecretary Ariel Nepomuceno, ini nga reported casualties ang iga-subject pa sa validation kag verification.
Magluwas diri suno sa opisyal, may yara man sang na-report nga 66 nga nasamaran kag may 34 pa nga nagapabilin nga missing.
Sa latest disaster monitoring bulletin sang National Disaster Risk Reduction and Management Council (NDRRMC), nakabutang man nga may yara sang 547 ka ginbaha nga mga lugar sa Regions I, II, III, CALABARZON, MIMAROPA, V, VI, VIII, IX, XIII, CARAGA, BARMM, kag National Capital Region.
Ginpahayag man sang OCD nga 4.472 million ka mga tawo ukon 1.062 million ka mga pamilya ang tuman gid nga naapektuhan sang bagyo. Sa sini nga numero, yara pa sa 82,000 ka mga pamilya ang wala pa nakahalin sa evacuation centers.
Sa halit naman sa imprastraktura, ginsiling sang NDRRMC nga may na-report na nga P203,826,014.38 nga balor sang damage bangud sa nagkalaguba nga mga dalan, taytay, mga building sa mga eskwelahan, kag iban pa.
Sa pihak nga bahin, nakalab-ot naman sa P87,529,788.11 ang estimated damage sa patag sang agrikultura apang indi pa ini pinal bangud naga-sige-sige pa ang pagsulod sang dugang nga data.
Biyernes sang nagguwa si Bagyo Kristine sa Philippine Area of Responsibility apang may gina-monitor nga isa pa gid ka bagyo nga posible opisyal nga magsulod sa PAR karon sa gab-i ukon buwas sa aga.#
