ILOILO CITY – May gindesignar na bilang mga officer-in-charge sa mga nabakante nga police stations sa siyudad sang Iloilo kasunod sang pag-relieve sa tatlo ka mga hepe sang kapulisan sa Iloilo City Police Office (ICPO).
Suno kay ICPO spokesperson Senior Insp. Sheila Mae Sangrines, temporaryo nga gindesignar tal-os kay Senior Insp. Mary Grace Borio sa Arevalo PNP si Senior Insp. Eduardo Siaton nga Team Leader man sang SWAT.
Buslan naman ni Chief Insp. Engelbert Banquillo nga Platoon Leader sa Iloilo City Police Mobile Force Battalion, si Chief Insp. Juvy Navales sa Mandurriao PNP samtang temporaryo anay nga mangin pinuno sang La Paz PNP si SPO4 Malificiar tal-os kay Jose Val Ladublan.
Temporaryo anay nga pangunahan sang mga natungdan ang ila tagsa ka istasyon tubtob nga makakita na sang permanente nga hepe ang Iloilo City Police Office.
Paathag ni Sangrines, indi naman bag-o para sa mga pulis ang reshuffling ilabi pa nga kabahin ini sang ila mga trabaho.