MANILA — Nagwalkout si Sen. Nancy Binay sa hearing sang Senate committee on accounts nga ginapamunuan ni Sen. Alan Peter Cayetano kaangot sa gasto sa New Senate Building.
Apisar indi myembro sang komite si Binay, nagtambong ini sa hearing bangud nabatian niya ang pahayag ni Cayetano nga welcome siya sa hearing.
Si Binay ang anay chair sang accounts committee nga nagakapot sa proyekto sang New Senate Building.
Nag-umpisa ang tensyon sang ginpamangkot ni Binay ang tiglawas sang Department of Public Works and Highways (DPWH) sa budgetary cost sang bag-o nga building.
“So tama po na on your documentation there’s no such thing as P23 billion for DPWH. Kaya sa tingin ko, si Usec. (Emil) Sadain, hindi ninyo ho kailangang mag-apologize,” pahayag ni Binay.
Sa hearing, ginpahayag ni Cayetano nga P23 billion ang balor sang kontruksiyon sang building lakip na ang P1.6 billion para sa land acquisition.
Apang nanindugan si Binay nga wala naglab-ot sa P23 billion ang balor sang kontruksiyon nga nauna na nga ginbulgar ni Senate President Francis “Chiz” Escudero kag Cayetano bangud nagabalor lang ini sang P21 billion.
“Tama ba po ba on you documentation, there’s no such thing as P23 bilyon for the DPWH,” pamangkot ni Binay kay DPWH Unsecretary Emil Sadain sang nagtambong sa hearing.
Ang DPWH amo ang nagadumala sa pagpatukod sang New Senate Building nga nahamtang sa Taguig City.
Apang ginkontra ni Cayetano si Binay kag ginpakita ang data halin sa DPWH nga nagapakita sang P23 billion nga cost estimate sang bag-o nga building.
Ang mga numero ang ginapahayag naghalin mismo sa Senate Coordinating Team kag mga staff ni Binay.
“You’ve been going around saying na mali ang numbers namin. So kung mali correct it. Ang nagbigay ng number sa amin staff mo and you’ve been going around telling people saan ba nanggaling eh galing nga sa staff mo. So anong problema?”
Gin-akusaran man ni Cayetano si Binay nga nagapangamo sa hearing.
Gin-athag naman ni Binay nga ang katuyuan niya amo nga tapuson ang pagpatukod sang bag-o nga building.
Gintudlo man ni Cayetano si Binay nga nagahimo sang mga isyu matapos iangot ang proyekto sang bag-o nga building sa lokal nga politika sa Makati kag Taguig.
Gindugang pa ni Cayetano nga mahimo ginhatag ni Binay ang mga pamangkot sang media sa iya.
“Sampung interview? Ekstong lahat ng question? Coincidence? Ang galing mo naman,” pahayag ni Cayetano.
“Bakit naman ako magbibigay ng tanong sa mga media, Mr. Chairman? Baka gawain mo ‘yung magbibigay ng tanong sa mga media. Excuse me,” balik nga pamangkot ni Binay.
Matapos nag walk-out si Binay, ginpahayag ni Cayetano nga, “nabuang ka na, day.”
“Tapusin natin ng maayos ito; Senado ito ng Pilipinas, hindi ito palengke,” dugang pa ni Cayetano.
