ILOILO CITY- Ginalauman nga itugyan sa gihapon sa mga myembro sang Nacionalista Party ang pila ka dalagko nga committee chairmanship sa kamara.
Sa interview sang Bombo Radyo kay incoming Iloilo 4th District Rep. Ferjenel Biron, iya ginpahayag nga base sa tradisyon, masami nga ginatugyan sa Nacionalista Party (NP) ang pila ka ginakabig “juicy chairmanship” kaangay sang deputy speakership, kag Representative to the Commission on Appointment.
Suno kay Biron, sa subong, indi pa maathag kun sin-o nga mga kongresista ang hatagan sang committee chairmansship apang ginpahayag niya nga masako ang NP sa paggiya sa mga bag-uhanon nga mga myembro sang kamara agud masiguro nga makakuha ang mga ini sang chairmanship ukon vice-chairmanship.
Sa bahin ni Biron nga nagaserbe nga Provincial chair sang NP sa Iloilo, ginpahayag niya nga wala man siya sang ihibalo kun ano nga komitiba ang itugyan sa iya agud pamunuan.
Samtang, ginplastar naman ni Biron nga halos unanimous na ang kamara sa pag-endorso kay House Majority leader kag reelected Leyte Rep. Martin Romualdez bilang masunod nga House Speaker kasunod man sang endorsement sang NP sa pakaisa ni presumptive president Ferdinand Marcos Jr.
Nahibaluan nga nakigkita kay Romualdez si Biron upod pa sa iban nga NP members nga sanday Senator-elect Mark Villar, Las Piñas Rep. Camille Villar, Ilocos Norte Representative-elect Sandro Marcos, kag Romblon Rep. Eleandro Jesus Madrona.
