ILOILO CITY – Nagapanawagan karon ang pamilya Demafelis sang silot nga kamatayon para sa mga nadakpan nga suspek sa pagpatay kay Joanna Daniela Demafelis kag ginsulod pa sa freezer.
Sa interview sang Bombo Radyo Iloilo, ginpahayag sang tiyo ni Joanna nga si Barangay Kagawad Pablo Demafelis, ang Bombo Radyo ang una nga nagpahibalo sa ila nga nadakpan na ang amo sang iya hinablos nga si Nader Essam Assaf, sa Lebanon.
Nagasamo ang emosyon nga nabatyagan sang pamilya kun sa diin nalipay sila nga nadakpan ang suspek pero nagapangibabaw gihapon ang kaakig batok sa mga amo ni Joanna.
Panawagan sini nga hatagan sang silot nga kamatayon ang mga responsable sa kamatayon ni Joanna.
Suno kay Demafelis, gusto nila nga bitayon sa atubang sang madamo nga tawo si Assaf bilang bayad sa brutal nga gindangatan ni Joanna.
Nagapasalamat naman ang pamilya Demafelis sa madasig nga pagdakop sa suspek kag nagalaum nga makit-an naman ang amo ni Joanna nga babaye.