Nadakpan nga serial rapist kag mga kaupod nga suspek, nagbasulay sa nahimo nga krimen

ILOILO CITY – Nagbasulay ang tatlo ka mga suspek sa carnapping kag abduction incident sa carpark sang SM City Mall sa Benigno Aquino Avenue, Iloilo City.
Matapos mag-surrender ang ika-tatlo nga suspek nga si Robert Tingson san Barangay Amamaros, Pototan, Iloilo, ginpahayag sini sa exclusive interview sang Bombo Radyo nga ginhagad lamang siya sang iya tupad balay nga si Raymond Cordero nga maghampang sang basketball.
Gikan sa banwa sang Janiuay, nagpadulong ang mga suspek sa Iloilo City kun sa diin gintabo nila ang ginatudlo serial rapist kag mastermind nga si Sirius Gim Villareal sang Tigbauan, Iloilo.
Suno kay Tingson, sang iya makita si Villareal, nagainit ang ulo sini kag daw kaangay nga naka-droga.
Nagpadulong ang tatlo sa isa ka ilimnan kun sa diin ginplano nanday Villareal kag Cordero ang plano nga carnapping.
Nagdiretso ang mga ini saSM City kag sang makita ni Villareal ang salakyan ni Mark Emil Jocson sang Banuyao, La Paz, iya ini gintoktok kag gintayaan sang armas ang biktima nga si Jocson antes sang mga ini gindala ang salakyan kaupod sa magkahagugma.
Suno kay Tingson, ila gingapos ang mga biktima samtang si Cordero ang nagmolestiya sa biktima nga si alyas Queenie sa sulod sang salakyan.
Ginpahayag naman ni Cordero sa Bombo Radyo nga ginmolestiya lamang niya ang biktima, bangud sa mando ni Villareal.
Sa karon preso na si Villareal sa Bureau of Jail Management and Penology bangud sa kaso nga rape nga nahimo sini duha ka tuig na ang nakaligad.
Preso naman sa Mandurriao police station kanday Cordero kag Tingson samtang natalana nga pasakaan sang kaso ang tatlo ka mga suspek.