Ginkumpirma sang opisina ni Senator Robin Padilla nga nag-resign na sa iya trabaho bilang political officer ang anay aktres nga si Nadia Montenegro.
“Today, we received the written explanation and letter of resignation of Ms. Nadia Montenegro. Her resignation has been accepted,” official statement sang office nga ginsapubliko subong nga adlaw, Agusto 18.
Kasunod ini sang pagkadalahig sang iya pangalan sa alegasyon sang paggamit sang marijuana sa sulod sang building sang Senado sa Pasay City.
Antes ang resignation, matandaan nga ginpa-leave anay ni Padilla si Montenegro samtang padayon ang internal investigation.
Nahibaluan nga base sa incident report nga napetsahan sang Agusto 13, ginplastar sang security personnel nga si Victor Patelo nga may duha ka insidente nga may napanimahuan nga indi kinaandan sa isa ka area sa Senate building.
Una amo ang sa ikaduha nga semana sang Hulyo 2025 kun sa diin may nag-report nga isa ka male staff member nga maisog nga baho, apang wala man sang nakit-an nga nagpanigarilyo.
Ikaduha amo ang Agusto 12 kun sa diin nagpalapit ang staff ni Senator Panfilo Lacson sa amo gihapon nga security personnel sa 5th floor, kag nagpanugid nga may indi kinaandan nga baho nga halin sa comfort room sang mga babaye malapit sa extension offices sang mga senador.
Ginpahayag nga daw marijuana ang baho kag ang tawo lamang sa area sa amo nga tion amo si Nadia.
Suno sa security personnel, ginmunuhan sini si Nadia sang naglabay ini sa iya pwesto, apang nagpanginwala ang former actress nga nagpanigarilyo ini ukon naggamit sang marijuana. Gin-ako sini nga may dala siya nga vape sa iya bag nga amo ang posible ang ginhalinan sang baho.
May ginpasa naman nga investigation report sa Office of the Senate President (OSP) kasunod sang amo nga insidente.#
