Posible gid nga mapasakaan sang kaso ang indibidwal nga nagkuha sang video nga nagalapta subong sa social media kun sa diin makit-an nga nagapakighilawas ang duha ka persona sa Esplanade 11 sa Brgy. Progreso, Lapuz, Iloilo City.
Sa interview sang Bombo Radyo kay PMAJ. Shella Mae Sangrines, spokesperson sang Iloilo City Police Office, iya ginpahayag nga may ara gid sang liability ang mga nagarekord ukon nagapalapta sang kaangay nga mga hitabo ukon eskandalo.
Base sa layi, madamo nga kaso ang posible nga ipasaka sa mga nagpalapta sang kaangay nga video lakip na ang Data Privacy Act of 2012, Cybercrime Prevention Act of 2012 kag iban pa.
Suno kay Sangrines, dako man ang posibilidad nga may iban pa nga kaso nga ipasaka sa nagvideo sa idalom sang Child Abuse law ilabi na nga menor de edad ang babayi nga involved sa kontrobersiya.
Ginpakigbahin man ni Sangrines nga padayun ang imbestigasyon sang Iloilo City Police Station 8 pinaagi sa Women and children protection desk kag may ara na ang mga ini sang nabatun nga impormasyon nahanungod pagkakilalal-an sang mga involved nga indibidwal kag sa tawo nga nagkuha kag nagpalapta sang scandal.
