Patay ang isa ka lalaki nga nagasakay sa bisekleta matapos nabungguan sang motorsiklo sa Barangay Pulao, Dumangas, Iloilo.
Ang biktima amo si Antonio Luz, mangunguma, residente sang Barangay Cansilayan sa amo nga banwa.
Ang driver sang motorsiklo amo si Roland Sarte, residente sang Barangay Poblacion Ilawod, Zarraga.
Sa interview sang Bombo Radyo kay Police Staff Sergeant Efren Gonzaga, imbestigador sang Dumangas Municipal Police Station, iya ginpahayag nga pareho nga padulong sa Barangay Balabag ang duha sang natabo ang aksidente.
Ginapahayag nga todo ang pagbunggo sang motorsiklo sa likod sang bike rason nga patal nga pilas sa ulo ang naangkon sang biktima kag nagsuka gid sang dugo antes nadulaan sang animo.
Gindala naman sa ospital si Sarte nga nakaangkon man sang bakras sa guya.
Suno kay Gonzaga, nakainom ang driver sang motorsiklo.
Pasakaan sang kaso nga Reckless Imprudence Resulting to Homicide and Damage to Property ang driver sang motor.
