Patay ang isa ka nagabusong nga nurse matapos mabungguan sang duha ka beses sang duha ka mga salakyan sa Purok Proper North, Barangay Taloc, Bago City, Negros Occidental.
Ang biktima amo si Maria Angela Buendia, 36-anyos, anum ka bulan nga nagabusong kag residente sang nasambit nga lugar.
Base sa imbestigasyon, nagatabok sa pedestrian lane kag magapadulong kuntani sa Valladolid agud magtrabaho ang nurse sang hinali lamang ini nga nabungguan sang Toyota Avanza Wagon nga ginamaneho ni Philip Jansen Cantiller, 30-anyos, residente sang Deca Homes Subdivision, Barangay Cabug, Bacolod City.
Nagtabog sa pihak nga lane bahin sang highway si Buendia apang ini ang nalapakan naman sang Toyota Yaris Wagon nga ginamaneho ni Salvador Castro, 59-anyos, residente sang Barangay Crossing Pulupandan, Pulupandan.
Bangud sa kakusog sang impact, nagwa sa tiyan sang biktima ang anum ka bulan sini nga lapsag.
Ginhingagaw pa ang iloy dala sa ospital apang gindeklarar nga dead on arrival.
Suno kay Cantiller, nagikan ini sa Cauayan kag papauli na sa Bacolod sang natabo ang aksidente.
Pahayag niya, siya ang nagasunod sa isa ka motorsiklo kag sang malapit na ini sa pedestrian lane, didto na lamang niya nadeparahan ang biktima nga nagaalang-alang sa pagtabok.
Suno sa iya 60 tubtob 70 km per hour ang kadasigon sang iya pagpadalagan kag nagpreno man ini apang nabungguan sini sa gihapon ang nasambit nga nurse.
Suno naman kay Castro, nagikan ini sa airport agud magsugat sa iya bata kag papauli na kuntani sa banwa sang Pulupandan.
60 km per hour ang kadasigon sang iya pagmaneho apang wala sini madeparahan ang babaye nga una na nga nabungguan bangud siya ang may ginasundan nga van rason kun ngaa iya ini nalapakan.
Nakahunong sa karun sa Bago City Police Station ang duha ka mga drivers sang duha ka mga pribado nga salakyan nga nakabunggo sa nurse nga nagabusong sa Purok Proper North, Barangay Taloc, Bago City, Negros Occidental.
Una na nga ginpahayag ni Police Lt. Col. Ariel Pico, officer-in-charge sang Bago City Police Station nga posible nga magapasettle na lamang ang pamilya sang biktima bangud aminado sila nga aksidente man ang natabo.
