𝗜𝗟𝗢𝗜𝗟𝗢 𝗖𝗜𝗧𝗬 — Naglab-ot sa 16.4 million ka mga Filipino nga naga-edad 15-anyos pataas ang nagagamit sang tobacco products ukon nagapanigarilyo sa Pilipinas.
Sa interview sang Bombo Radyo kay Dr. Florence Yul Saquian, Diplomate sa Philippine Board of Otorhinolaryngology, iya ginpahayag nga ang masami nga pagpanigarilyo ang makaapekto sa aerodigestive tract kag posible nga makatuga sang laryngeal carcinoma kag lung cancer.
Suno kay Saquian, ang Polycyclic aromatic hydrocarbons (PAH) amo ang may pinakadako nga role sa isa ka tobacco bangud ini ang kabahin sang carcinogenic chemicals.
Ginpaathag man sini nga indi ang ingredient nga nicotine ang nagatuga sang laryngeal carcinoma nga masami nga ginahambal sang kadam-an, bangud ang carcinogenic chemicals ang rason kun ngaa naga-trigger amo nga balatian.
Nagpahanumdum man ini sa mga pamatan-on nga likawan ang pagpanigarilyo agud nga mapalayo ang ikaayong-lawas nga makaangkon sang nasambit nga mga balatian.
Nahibaluan nga anay na nga nagpahayag ang administrasyon ni President Ferdinand R. Marcos, Jr. nga hatagan sang igtalupangod ang pagsulundan batok sa tobacco sa pungsod.
Nagpasalig naman ang gobyerno nga i-intensify ang multi-sectoral national strategy sa tobacco regulation paagi sa enactment sa Vaporized Nicotine and Non-Nicotine Products Regulation Act nga nagaprotekta sa mga menor-de-edad, lakip ang online trade, kag distribution kag marketing sang produkto.
