Yara na sa advanced state of decomposition ang bangkay sang mag-asawa sang nasapwan sa guwa sang ila balay sa Brgy. Constancia, San Lorenzo, Guimaras.
Ang mga biktima ang ginapahayag naga-edad sang ginabanta 50-anyos.
Base sa inisyal nga pagpangusisa, wasak na ang ulo sang babayi nga biktima kag diutayan man nga mautod ang ulo sang iya nga bana.
Lunsay man ang mga ini nakitaan sang igu sang bala apang ginahibalo pa kun ano nga sahi sang armas ang gingamit sa krimen.
Suno sa Guimaras Police Provincial Office, na-recover man sang pulis ang basiyo sang mga bala sa lugar kun sa diin nasapwan ang mga bangkay.
Ginapahayag nga nakit-an ang misis sa atubang nga bahin sang balay, nagakaya, kag nagalapta na ang bagol; samtang nasapwan naman ang bana sini malapit sa ila nga babuyan.
Malayo ang balay sang mag-asawa sa iban nga mga pamalay, apang sandig sa inisyal nga imbestigasyon, may nabatian ang iban nga mga pumuluyo nga lupok sang pusil sang nagligad nga Myerkules sang gab-i.
Ginatul-id pa kun sin-o ang may kahimuan sa makangilidlis nga krimen kag kun ano ang motibo.
