Indi pa kumbinsido ang Iloilo Provincial Government sa ginaduso sang Inter-Agency Task Force for the Management of Emerging Infectious Diseases (IATF-EID) nga vaccination card na lamang ang ipakita sang mga byahero nga fully vaccinated batok sa COVID-19 para sa interzonal travel kag intrazonal movement sa nagkalain-lain nga bahin sang Pilipinas.
Sa interview sang Bombo Radyo kay Iloilo Governor Arthur Defensor Jr., iya ginpahayag nga kun may nagapameke sang Reverse transcription polymerase chain reaction (RT-PCR) test, dako man nga posibilidad nga i-peke man sang iban ang vaccination card para makabyahe.
Suno kay Defensor, magasunod man ang probisnya sa tion nga ipatuman sang IATF sa bug-os nga pungsod ang bag-o nga pagsulundan apang nagakadapat nga may yara sang standard nga vaccination card para sa mga indibidwal nga fully vaccinated.
Importante ini suno sa gobernador agud masigurado nga wala sang may magpameke sang ila nga vaccination card kag mapat-od nga fully vaccinated ang isa ka indibidwal nga magabyahe sa nanuhay-tuhay nga bahin sang pungsod.
Matandaan nga una na nga ginpahayag ni Presidential Spokesperson Atty. Harry Roque, nga indi na kinahanglan pa nga magpakita sang negative nga swab test results ang mga fully vaccinated individuals sa pagtravel.
Suno kay Roque, sa idalom sang bag-o nga protocol sang IATF, nasaad sa Resolution No. 124-5 nga ang mga fully vaccinated nga indibidwal ang kinahanglan nga nabakunahan sang mga nalakip sa listahan sang Emergency Use Authorization (EUA) ukon Compassionate Special Permit (CSP) nga gin-isyu sang Food and Drug Administration ukon Emergency Use Listing sang World Health Organization (WHO).
