Ginakabig man nga isa sa mabug-at nga problema sang pila ka mga punong barangay sa syudad sang Iloilo ang huol nga dala sang mga nagalay-lay nga kuryente.
Sa interview sang Bombo Radyo kay Punong Barangay John Garry Patnubay sang Barangay East Baluarte, Molo, Iloilo City, iya ginpahayag nga magluwas sa makitid nga mga dalan nga nagapabudlay sa pagsulod sang fire trucks kag iban pa nga emergency vehicles sa lugar nagatuga man sang peligro kag nagadisturbo nga linya sang kuryente sa lugar.
Gindugang man niya ang problema sa wire sang telecommunication companies (telco), bangud may mga kable nga nagawayway kag nagalapta, nga mahimo mangin risgo indi lamang sa sunog kundi pati sa iban pa nga aksidente.
Bilang preparasyon sa sunog, naka-install na ang barangay sang dry stand pipe agud may madali nga makuhaan sang tubig kun may ara sang emerhensya kaangay sang sunog.
Ginapanawagan man ni Patnubay sa mga residente nga indi magpatigayon sang illegal nga koneksyon sa kuryente kag magbuligay sa pagmentinar sang maayo nga paggamit sini.
Dugang pa sini nga bisan pa indi Fire Prevention Month, ginahangkat sini ang tanan nga magpadayon sa paghalong kag magmabinantayon agud malikawan ang sunog kag iban pa nga disgrasya sa ila lugar.
