Nag-apelar ang Jalasig Sugarcane Planters Association Incorporated kay Presidente Rodrigo Duterte nga pauntaton ang pag-export sang kalamay sa Estados Unidos.
Nahibaluan nga ang quota sang pungsod sa pag-export sang kalamay ang yara sa 7% sang kabilugan nga produksyon ukon 140,000 metric tons sa diin mas barato ang presyo sang isa ka bag sang kalamay nga gina-export kun ipaanggid sa domestic price.
Sa interview sang Bombo Radyo kay Iloilo 3rd District Board Member Matt Palabrica kag myembro sang Jalasig Sugarcane Planters Association Incorporated, iya ginpahayag nga una na ginforecast sang Sugar Regulatory Administration (SRA) ang kakulang sang suplay sang kalamay nga nagadangat sa 300, 000 metric tons sa pungsod.
Apang suno sa iya, ginpahanugutan pa sang SRA ang exportation sang 69,000 metrict tons sang kalamay sa Estados Unidos.
Nagapati si Palabrica nga indi obligado ang pungsod sa pag-export sang kalamay bangud wala man sang trade agreement.
Suno kay Palabrica, sa kada bag sang ‘A’ sugar nga gina-export, P350 diri ang pyerde sang mga mangunguma.
Pahayag ni Palabrica, bangud sini, tuman ka apektado sila nga local sugarcane farmers.
Dugang pa niya, kun i-export pa sang pungsod ang nabilin nga 34,000 metric tons sang kalamay, magasaka na sa P721 million ang total nga pyerde sang sugarcane farmers bangud sa manubo nga purchase price sang ‘A’ sugar.
