Kritikal ang kondisyon sang isa ka kilala nga kandidato sa pagkapresidente sa Colombia matapos gintiro sang makatatlo ka beses samtang nagapangampanya sa Bogota.
Ang biktima ang ginkilala kay Miguel Uribe, 39-anyos, kag residente sang Bogota City, Colombia.
Samtang ang suspek ang isa ka menor de edad.
Suno sa mga otoridad, si Uribe, isa ka miembro sang Democratic Center party, gintiro sang makaduha ka beses sa ulo kag isa ka bes sa tuhod samtang nagahambal sa atubang sang iya mga supporters.
Base sa kumpirmasyon sang Santa Fe Clinic sa Bogota, gin-airlift si Uribe padulong sa ospital kun sa diin, ginpaidalom sia sa “neurosurgical” kag “vascular procedure.”
Pilason man ang duha ka iban pa nga indibidwal samtang na-recover ang Glock-style nga armas.
Gilayon man nga nadakpan ang 15 anyos nga suspek, apang wala pa matumod ang motibo sang pagpangluthang sini.
Suno kay Defense Minister Pedro Sanchez, handa naman sila nga maghatag sang pabuya nga $725,000 para sa impormasyon nga makatudlo kun sin-o sa likod sang pagpangluthang.
Si Uribe ang isa ka kilala nga kritiko, anak siya ni Diana Turbay, isa ka respetado nga Colombian journalist nga napatay sang 1991 matapos siya gin-kinap sang Medellín Cartel ni Pablo Escobar.
Siya man ang nagserbe bilang senador humalin 2022 kag nangin government secretary kag konsehal sa Bogota. Nagpadalagan man siya sa pagka-alkalde sa nasambit nga pungsod sang tuig 2018 apang wala nagmadinalag-on.
