Dapat nga untaton na ang pagpalapta sang sala nga impormasyon nga may yara sang ipatuman nga holiday lockdown.
Ini ang pahanumdom ni Department of Justice Secretary Menardo Guevarra sa publiko subong nga holiday season.
Suno kay Guevarra, wala sang opisyal nga anunsyo may kaangtanan diri kag samtang nga wala pa sang pinal nga pahayag halin sa otoridad, kinahanglan nga likawan ang pagpalapta sini nga mga rumor.
Nahibaluan nga naalarma ang mga netizens bangud sang mensahe nga nagagwa sa social media nga nagaalegar nga may yara sang lockdown nga ipatuman umpisa sa Disyembre 23 tubtob sa Enero 3 sa masunod nga tuig.
Ini nga alegasyon ang gin-deny man sang mga opisyal nga gobyerno kag gintawag nga ‘fake news’.
Hingyuon pa ni Guevarra sa National Bureau of Investigation nga hibaluon kun sin-o ang yara sa likod sang nasambit nga rumor.
