ILOILO CITY- Nagahanda na sa subong sang oil spill booms ang mga nagapanag-iya kag nagabantay sang mga punungan sa bahin man sang Dumangas, Leganes, Zarraga, kag iban pa nga kabanwahanan, sa mangin epekto sang oil spill sa mga fishpens kag punungan.
Sa Good Morning Philippines Program ginpahayag ni Tomas Jautea, Presidente sang Iloilo Fish Producers Association,naghatag na sila sang abiso sa iban pa nila nga kaupdanan nga maghanda sang improvised nga mga oil spill booms nga mahimo magamit.
Suno kay Jautea, magluwas sa mga spill booms, may abiso man nga kun nalaba-ot na sa nasambit nga mga banwa ang oil spill, indi nalang magpasulod sang tubig sa mga punungan agud malikawan nga mahiluan kag makakaon sang bunker fuel ang mga isda.
Pahayag pa niya, linibo man sa ila nga mga manugpunong ang maapektuhan sa tion nga indi matapos ang problema sa oil spill.
Magluwas sa epekto sang oil spill, nagahingyo man sila nga kuntani indi lang pagdayunon ang pagpatindog sang oil depot malapit sa mga punungan sang Dumangas bangud mas dako pagid ang epekto sini sa ila.
Nahibaluan nga magluwas sa mga ila nga mga manugpunong,apektado man suno sa natungdan ang mga nagaculture sang talaba kag ang mga nagapanguha sang pakinhason.
