TAIPEI, TAIWAN – Ginlockdown ang isa ka electronics company matapos naglatnanay sa COVID-19 ang 77 ka empleyado sa Taipei, Taiwan.
Ang nasambit nga Taiwanese semiconductor supplier ang ginakabig nga leading chip testing service provider sa bilog nga kalibutan.
Suno kay Bombo International Correspondent Dr. Reynand Dumala-on direkta sa Taiwan, sa 77 ka empleyado nga nagpositibo sa COVID-19 sa nasambit nga kompaniya, 73 diri ang lunsay Filipino.
Ini ang kasunod sang pagpaidalom sa swab test sa 7,300 tanan ka mga empleyado sang amo nga kompaniya.
Ginpahayag ni Dumala-on nga ginpauntat na ang produksyon sang amo nga kompaniya agud nga i-disinfect ang bug-os nga working environment.
Dugang sang natungdan, sa subong nakaquarantine na ang tanan nga COVID-19 positive nga mga empleyado sa diin padayon man sila nga ginaswelduhan sang kompaniya.
Nahibaluan nga ini ang pinakauna nga Taiwanese tech supplier nga nangin tuman ka apektado ang produksyon umpisa sang nagsugod ang pandemya.
Una na nga ginpaidalom sa alert level 3 ang Taipei, Taiwan sang nagligad nga bulan sa diin posible pa ini nga palawigon tubtob Hunyo 28 bangud sa padayon nga pagsaka sang COVID-19 cases.
