ILOILO CITY – Ginpatpat sang isa ka public health expert ang mga rason kun ngaa nagabatyag sang tension headache kag migraine ang tawo.
Sa interview sang Bombo Radyo kay Dr. Philip Ian Padilla, iya ginpahayag nga kun nagabatyag sang paghugot kag nagapitik ang ulo, ginatawag ini nga tension headache samtang migraine naman kun mabug-at ang ulo kag may makit-an nga naga igpat-igpat.
Suno kay Dr. Padilla, isa sa mga kumon nga rason sang tension headache amo ang masami nga pag-atubang sa computer.
Ang migraine naman ang masami makuha sa gahod ukon noise pollution kag kun masilawan.
Pahayag sang natungdan, mahimo man nga mangin resulta sang migraine ang huni sang lato-lato.
Ginpaboran man sang health expert ang masami nga mabatian sa mga tawo nga nagalingin ukon nagasakit ang ila nga ulo tungod nagaproblema sa kwarta, bangud suno sa iya, naga-react sa stress ang nervous system kag nagaresulta ini sang tension headache.
Panugyan ni Dr. Padilla, magpahuway kun ginakapoy ang mata kag lawas agud malikawan ang pagsakit sang ulo samtang kun nagabatyag sang migraine, gilayon nga mag inom sang bulong nga prescribed sang doctor.
